Tuesday, November 14, 2017

ಧಾರಾವಾಹಿ ಪ್ರಪಂಚ



ಇತ್ತೀಚಿಗೆ ನನಗೆ ಕೆಲವು ದಿನಗಳ ಮಟ್ಟಿಗೆ ಟೀವಿ ಧಾರವಾಹಿ ನೋಡುವ ಅವಕಾಶ ಒದಗಿ ಬಂದಿತ್ತು. (ಅನಿವಾರ್ಯ ಕಾರಣಗಳಿಂದಾಗಿ ಎಂದು ಹೇಳಬೇಕಾಗಿಲ್ಲವಷ್ಟೇ ) ಅದನ್ನು ಗಮನಿಸಿದ ನಂತರ ಪ್ರಪಂಚವನ್ನು ನೋಡುವ ದೃಷ್ಟಿಕೋನವೇ ಬದಲಾಗಿ ಹೋಯಿತು. ನನ್ನಂತ ಸಾಕಷ್ಟು ಜನ ಪುರುಷಪುಂಗವರು, ಮಹಿಳೆಯರು ಟೀವಿ ನೋಡೋ ಸಮಯದಲ್ಲಿ ಸ್ನೇಹಿತರೊಡನೆ ಶರಬತ್ತು ಕುಡಿಯುತ್ತಾ ಕಾಲ ಕಳೆಯುವರು ಅಥವಾ ರಂಗಣ್ಣ - ರಾಧಮ್ಮನ ಶಬ್ದ ಮಾಲಿನ್ಯವನ್ನು ಸಹಿಸುವರು ಎಂದು ತಿಳಿದಿದೆ. ಅವರನ್ನು ಜ್ಞಾನ ಮಾರ್ಗಕ್ಕೆ ಕರೆದು ತರುವುದೇ ಜನ್ಮ ಸಾರ್ಥಕ್ಯವೆಂದು ನನಗೆ ತೋರುತ್ತಿದೆ.


ಆದರೆ ಇದಕ್ಕಾಗಿ ನೀವು ನನಗೆ ವಿಶೇಷ ಅಭಿನಂದನೆ ತಿಳಿಸಬೇಕಾದ ಅಗತ್ಯ ಇರುವುದಿಲ್ಲ. ಯಾಕೆಂದರೆ ..
ವೀರನಾರಾಯಣನೆ ಕವಿ ನಾನು ಕೇವಲ ಲಿಪಿಕಾರ ಎಂದು ಕುಮಾರ ವ್ಯಾಸ ಬರೆದುಕೊಳ್ಳುತ್ತಾನೆ. ಅದೂ ಅಲ್ಲದೆ, ಜ್ಞಾನವು ಅಪೌರುಷೇಯ ಎನ್ನುತ್ತದೆ ಪರಂಪರೆ. ಹಾಗಾಗಿ ನಿಮ್ಮ ಮೆದುಳಿನ ಸೂಕ್ಷ ತರಂಗಗಳನ್ನು ಬಡಿದೆಬ್ಬಿಸಿ, ಮಂಡೆಯನ್ನು ಹೆಚ್ಚು ಚುರುಕು ಮಾಡುವುದಷ್ಟೇ ನನ್ನ ಕೆಲಸ.
ಹಾಗಾಗಿ ತಡ ಮಾಡದೇ ಕೆಳಗಿನ ಧಾರವಾಹಿ ಜಗತ್ತಿನಲ್ಲಿ ನಾನು ಕಂಡುಕೊಂಡ ಸತ್ಯ ತಿಳಿದು ಜೀವನವನ್ನು ಸಂತೋಷ, ಎಚ್ಚರದಿಂದ ಕಳೆಯಿರಿ.

1.       ಮನೆಗೆ ಯಾರೇ ಸುಂದರ ಹುಡುಗಿ ಬಂದರೂ.. ಅದು ಹಾವು ಆಗಿರಬಹುದು. ನಿಮ್ಮ ಮನೆಗೆ ಅಕಸ್ಮಾತ್ ಆಗಿ ನಾಗಮಣಿ ಬಂದಿರಬಹುದು. ಅಥವಾ ನೀವು ಕೂತ ಕಾರು – ಬಸ್ಸು.. ಎತ್ತಿನ ಗಾಡಿ ಹಾವಿನ ಬಾಲವನ್ನು ಮೆಟ್ಟಿರಬಹುದು. ಆ ಸೇಡಿಗೆ ನಾಗಿಣಿ ಬಂದಿರಬಹುದು. ಹಾಗಾಗಿ ಯಾವುದಕ್ಕೂ ಒಂದು ಪುಂಗಿ ಇಟ್ಟುಕೊಂಡು ಓಡಾಡೋದು ಒಳಿತು!

2.       ಗಹನವಾದ ಚರ್ಚೆ ಅಥವಾ ಮನೆಯಲ್ಲಿ ಶುಭ ಕಾರ್ಯ ನಡೆಯುತ್ತಿರುವಾಗ, ಗಂಡನಿಗೆ ಆಫೀಸ್ ನಿಂದ ಕರೆ ಬಂದರೆ... ಅದು ದೇವರಾಣೆ ಕಚೇರಿಯಿಂದ ಆಗಿರುವುದಿಲ್ಲ. ಆತನ ಹಳೇ ಗೆಳತಿ ಆಗಿರಬಹುದು. ಕಣ್ಣಿಡುವುದು ಒಳಿತು.

3.       ಯಾರದ್ರು ಮೆಡಿಕಲ್ ಶಾಪ್ ಗೆ ಹೋದರೆ, ಅವರು ವಿಷವನ್ನು ಕೊಳ್ಳಲು ಹೋಗುತ್ತಾ ಇದ್ದಾರೆ ಎಂದೇ ಭಾವಿಸಬೇಕು! ಈ ಜನಗಳಿಗೆ ಅದು ಹೇಗೋ, ಎಷ್ಟು ಬೇಕಾದ್ರೂ ನಿದ್ರೆ ಮಾತ್ರೆಗಳು ಸಿಗುತ್ತವೆ. ಕಾರ್ಕೋಟ ವಿಷದ ಪುಡಿಗಳು ಕೈ ತುದಿಯಲ್ಲೇ ಇರುತ್ತದೆ. ಪ್ರೀತಿಯಿಂದ ಮನೆಯಲ್ಲಿ ಹಾಲು ಕೊಟ್ಟರೆ ಅದು.. ಪ್ರಾಣವನ್ನೇ ತೆಗೆಯಬಹುದು.

4.       ನಿಮ್ಮ ವೈರಿಗಳನ್ನು ಏನೇ ಮಾಡಿದರೂ ಸಾಯಿಸಲು ಸಾಧ್ಯವಿಲ್ಲ. ಸುಪಾರಿ ಕೊಟ್ಟರೂ, ಬಾಂಬು ಸಿಡಿಸಿದರೂ, ಕೊನೆಗೆ ಹುಲಿ ಬಾಯಿಗೆ ತಳ್ಳಿದರೂ ... ಉಹುಂ. ಸಾವೇ ಇಲ್ಲ. ಎಲ್ಲಾ ಶಾಶ್ವತ. (ಧಾರಾವಾಹಿ ನೋಡೋರನ್ನು ಬಿಟ್ಟು )

5.       ನಾನು ಮೊದಲೆಲ್ಲಾ ದೇವರು ಸ್ವರ್ಗದಲ್ಲೋ, ಹಿಮಾಲಯದಲ್ಲೋ ... ಇರುವನೆಂದು ಭಾವಿಸಿದ್ದೆ. ಈಗ ಆತ ಪ್ಲಾಸ್ಟಿಕ್ ಸೆಟ್ ನಲ್ಲಿ ವಾಸಮಾಡುತ್ತಾನೆ ಎಂದು ತಿಳಿದು ಬಹಳ ಖೇದವಾಗುತ್ತಿದೆ! L

6.       ಕನ್ನಡದಲ್ಲಿ ಕನಿಷ್ಠ 6 ಮನೋರಂಜನಾ ಚಾನೆಲ್ ಇದೆ. ಒಂದೊಂದರಲ್ಲಿ ಕನಿಷ್ಠ 8 ಮೆಗಾ ಧಾರವಾಹಿ ಬರುತ್ತಲಿದೆ ಎಂದರೆ, ದಿನಕ್ಕೆ 45 -50 ಧಾರಾವಾಹಿಗಳು! ಪ್ರತೀ ಮನೆಯಲ್ಲಿಯೂ ಒಂದು ಅತ್ತೆ, ಸೊಸೆ, ಮಗ, ಮಗಳು, ಅಡುಗೆಯವರು, ನಾದಿನಿ.. ಇತ್ಯಾದಿ. ಆಮೇಲೆ ಸೊಸೆಯ ಕುಟುಂಬ, ಸೊಸೆಯನ್ನು / ಅತ್ತೆಯನ್ನು ಕೊಲ್ಲಲು ಅಂತಲೇ ಇರುವ ಸುಪಾರಿ ಕೊಲೆಗಾರರು.. ಹೀಗೆ ಸಾಕಷ್ಟು ಮನೆಗಳು ಬರುತ್ತವೆ. ಅವರಿಗೆ ಸಾಕಷ್ಟು ಸಮಯವೂ ಇದ್ದಂತೆ ತೋರುತ್ತದೆ. ಆದರೆ, ಯಾರೂ ಧಾರವಾಹಿ ನೋಡುವುದಿಲ್ಲ. ಅವರೇ ನೋಡುವುದಿಲ್ಲ ಎಂದಮೇಲೆ ನಾವು ನೋಡಬೇಕೆ? ಪುಟ್ಟಗೌರಿ ಅಜ್ಜಿ,.. ಯಾವ ಧಾರವಾಹಿ ನೋಡುತ್ತಾಳೆ ?

7.       ಕೊನೆಯ ಮತ್ತು ಅತ್ಯಂತ ಹೆಚ್ಚಿನ ದುರಂತ ಏನು ಅಂದರೆ... ಸಾಮಾನ್ಯವಾಗಿ ಧಾರಾವಾಹಿಯ ಎಲ್ಲಾ ಗಂಡು ಜೀವಿಗಳಿಗೆ ಒಂದೊಂದು ಎಕ್ಸ್ಟ್ರಾ ಸಂಬಂಧ ಇರುತ್ತದೆ. ಬಡ್ಡಿ ಮಗಂದು ನಿಜ ಜೀವನದಲ್ಲಿ ಒಂದೂ ಇರಲ್ಲ. ಆದರೂ ಹೆಂಡ್ತಿ ಅನುಮಾನ ಪಡ್ತಾಳೆ! L



ಸದ್ಯಕ್ ಸಮಾಪ್ತಿ!


Friday, September 22, 2017

ಜನ್ನತ್ ಭಾಗ್ಯ




ನೀವು ನನ್ನ ಮಾತನ್ನು ಒಪ್ಪದೇ ಹೋಗಬಹುದು.
ಸಿದ್ದರಾಮನ ಭಕ್ತ ಎಂದು ಜರಿಯಬಹುದು.
ನನ್ನ ಮೇಲೆ ನೀವು ಕಾಮೆಂಟ್ / ಬೆದರಿಕೆ ಅಸ್ತ್ರ ಜಡಿಯಬಹುದು.
ಇರಲಿ. ಒಳ್ಳೆಯದನ್ನು ಗುರುತಿಸುವುದಕ್ಕೆ, ಹೊಗಳುವುದಕ್ಕೆ ಯಾವ ಅಂಜಿಕೆಯೂ ನನಗಿಲ್ಲ.

ಸದ್ಯಕ್ಕೆ ಕರುನಾಡು ಅತ್ಯಂತ ಪ್ರಗತಿ ಹೊಂದಿದ ರಾಜ್ಯ ಎಂದೇ ನನ್ನ ಭಾವನೆ.
ಕಾರಣ ಇಷ್ಟೇ,
ಇಲ್ಲಿನ ಪೋಲಿಸರೋಬ್ಬರನ್ನು ಬಿಟ್ಟು, ಮಿಕ್ಕ ಎಲ್ಲಾ ಜನರು ವಿಪರೀತ ಬುದ್ದಿವಂತರಾಗಿದ್ದಾರೆ.!

ಬೇಕಿದ್ರೆ ಗಮನಿಸಿ.
ಡಿ.ಕೆ ರವಿ ಹಾಗೂ ಡಿವೈಎಸ್ಪಿ ಗಣಪತಿ ಅನುಮಾನಾಸ್ಪದ ಸಾವಿಗೆ ಈಡಾದಾಗ, ನಮ್ಮ ಪೋಲಿಸರಿಗಿಂತಲೂ ಪತ್ರಿಕೆಗಳು – ಟೀವಿ ನ್ಯೂಸ್ ಗಳು ತರಹೇವಾರಿ ತನಿಖೆ ಮಾಡಿದವು. ಒಂದು ಟ್ಯಾಬ್ಲಾಯ್ಡ್ ಅಂತೂ... ರವಿ ಅವರು, ಯಾವುದೋ ಮಹಿಳೆಗೆ 40 – 50 ಕಾಲ್ ಮಾಡಿದ್ದರು ಎಂದೆಲ್ಲ ವರದಿ ಮಾಡಿದ್ದರು. ಗಣಪತಿಯವರ ಆರೋಗ್ಯದ ಬಗ್ಗೆ ಏನೆಲ್ಲಾ ಹೇಳಿಕೆ ಕೊಟ್ಟರು. ಆದರೆ ನಮ್ಮ ಪೊಲೀಸರು ಮಾತ್ರ, ಯಾವ್ದೋ ಹಳೇ ಸಿ ಸಿ ಟೀವಿ ಫೂಟೆಜ್ ಇಟ್ಕೊಂಡು ಕೂತಿದ್ರು! ಈ ಪತ್ರಿಕೆಯವರನ್ನ, ಮಂತ್ರಿಗಳನ್ನ ಹಿಡಿದು ಕೇಳಿದ್ರೆ, ಸತ್ಯ ಗೊತ್ತಾಗಿರೋದು. ಪಾಪ.. ನಮ್ಮ ಪೊಲೀಸರು ದಿನಾ ಬೆಳಿಗ್ಗೆ ನೆನೆಸಿದ ಬಾದಾಮಿ ತಿನ್ನೋಲ್ಲ ಅನ್ಸುತ್ತೆ. ಬುದ್ದಿನೇ ಇಲ್ಲ.

ಆದುದರಿಂದ ನಾವು ಕೆಲವೊಂದು ಸಣ್ಣ ಪುಟ್ಟ ಸಲಹೆಗಳನ್ನು ನಮ್ಮ ದೊರೆಗೆ ಕೊಡುತ್ತಿರುವೆ. (ಸಲಹೆ ಕೊಡೋಕೆ ಅಂತಲೇ, ಸುಮಾರು ಜನರನ್ನು ಅವರು ಸಂಬಳ ಕೊಟ್ಟು ಇಟ್ಟುಕೊಂಡಿರಬಹುದು. ಆದರೆ ಈ ಕೆಳಕಂಡ ಸಲಹೆಗಳು ಪೂರ್ಣ ಉಚಿತ.)

೧. ಜನ ಬುದ್ದಿವಂತರು ಆದರೆ ಸಾಲದು. ಪೋಲಿಗಳೂ ..ಓಹ್ ಸಾರಿ. ಪೋಲಿಸರೂ ಬುದ್ದಿವಂತರು ಆಗಬೇಕು. ಹಾಗಾಗಿ ನಮ್ಮ ಶ್ರೀಧರ್ ನೇತೃತ್ವದಲ್ಲಿ ಪೊಲೀಸರಿಗೆ ತರಬೇತಿ ಕೊಡಿಸಬೇಕು. ಹೆಂಗೂ ಅಗ್ನಿಗೆ ಪೋಲಿಸ್
ಠಾಣೆ ಹೊಸದಲ್ಲ. ಸೆಲ್ ಒಳಗೆ ಕುಂತೇ ಅವರು ಟ್ರೈನಿಂಗ್ ಕೊಡಬಲ್ಲರು.

೨. ಮೂಢನಂಬಿಕೆ ವಿರುದ್ದ ಹೋರಾಡುತ್ತಿರುವ ಕಾವಿಧಾರಿ  ಶ್ರೀ ಶ್ರೀ ಶ್ರೀ ನಿಡುಕಾಮಿಡಿ ಸ್ವಾಮೀಜಿ (!) ಅವರಿಗೆ ಯಾರ ಕೊಲೆ ಯಾರು ಮಾಡಿದರು , ಮುಂದೆ ಯಾರ ಕೊಲೆ ಆಗಲಿದೆ ಎಂದೆಲ್ಲಾ ತಿಳಿದಿದೆ. ಅವರನ್ನು ಇಲಾಖೆಗೆ ಪತ್ತೆದಾರಿಕೆ ವಿಭಾಗಕ್ಕೆ ಸಲಹೆ ಕೊಡಲು ನೇಮಕ ಮಾಡಿಕೊಳ್ಳಬೇಕು. ಅವಾಗ ಎರಡೇ ನಿಮಿಷದಲ್ಲಿ ಎಲ್ಲಾ ಕೇಸುಗಳು ಕ್ಲೊಜು ಆಗುವುದು.

೩. ನಮ್ಮ ಬರಗೆಟ್ಟ ಸಾಹಿತಿ .. ತೋಪು ಸಿನೆಮ ನಿರ್ದೇಶಕ (ತೋ ಯಾವ್ದೋ ಒಂದು ಹೆಸರು. ಮಕ್ಕಳ ಪುಸ್ತಕದಲ್ಲಿ ತಪ್ಪಾದಂತೆ ಇಲ್ಲೂ ಅವರಹೆಸರು ಬಿಟ್ಟು ಹೋಗಿದೆ ಬಿಡಿ) .. ಹಾಗು ಪ್ರಶಸ್ತಿ ವಿಜೇತ ಭಗವಾನರ್ ಗೆ ಇತಿಹಾಸ / ಪುರಾಣದಲ್ಲಿ ಯಾರು – ಯಾರನ್ನ ಸಾಯಿಸಿದರು, ಯಾಕೆ ಸಾಯಿಸಿದರು ಎಂದೆಲ್ಲಾ ತಿಳಿದಿದೆ. ಹಾಗಾಗಿ, ಇವರುಗಳ ಕೈಲಿ, ಹೊಸದಾಗಿ ಕಾವ್ಯ – ಪುರಾಣ ಎಲ್ಲವನ್ನೂ  ಅರಾಬಿಕ್, ಲ್ಯಾಟಿನ್ ಭಾಷೆಯಲ್ಲಿ ಬರೆಸಬೇಕು. (ಪಾಳಿ ಭಾಷೆ ಎಂದಿರ? ಸನ್ಮಾನ್ಯರು ಬುದ್ದನನ್ನು ಓದಿಲ್ಲ ಬಿಡಿ. ಹಂಗಾಗಿ ಪಾಳಿಯ ಹೆಸರಿಲ್ಲ)

೪. ಇಷ್ಟು ಮಾಡಿದರೆ ಸಾಲದು. ಸರಕಾರ ಕೆಲವು ಹೊಸ ಕಾನೂನು ಕೂಡ ಜಾರಿಗೆ ತರಬೇಕಾಗುತ್ತದೆ. ಉದಾ: ಅರ್ ಎಸ್ ಎಸ್ / ಬಿಜೇಪಿ ಯವರು ಯಾರೇ ಕೊಲೆಯಾದರೂ .. ಅದನ್ನು ಆತ್ಮಹತ್ಯೆ ಎಂದು ಘೋಷಿಸಬೇಕು. ಹಾಗು ಮಿಕ್ಕ ಯಾರೇ ಸತ್ತರೂ.. ಅದಕ್ಕೆ, ಅರ್ ಎಸ್ ಎಸ್ ಕಾರಣ ಎಂದು ತಿಳಿಸಿ, ಸಿಕ್ಕವರನ್ನು ಹಿಡಿದು ಬಡಿಯಬೇಕು. (ಅನಂತ ಮೂರ್ತಿಯವರು ತೀರಿಕೊಂಡಾಗ .. ಹಿಡಿದು ಬಡಿದರಲ್ಲ ಹಂಗೆ ) ಬೇಕಿದ್ರೆ ಈ ಕಾಯಿದೆಗೆ ಜನ್ನತ್ ಭಾಗ್ಯ ಎಂದು ಹೆಸರಿಡಲಿ. ನನ್ನ ಪೂರ್ಣ ಬೆಂಬಲ ಇದೆ.


ಇಷ್ಟು ಮಾಡಿದರೆ ಸಾಕು.
ಕರ್ನಾಟಕ ಪೋಲಿಸ್ ಹೆಸರು ಉಚ್ಛ್ರಾಯ ಸ್ಥಿತಿಗೆ ಹೋಗುತ್ತದೆ. ಸಾಯಿಕುಮಾರ್ ನಟಿಸಿ – ಕನ್ನಡಿಗರನ್ನು ರಂಜಿಸಿದಕ್ಕೂ ಒಂದು ಅರ್ಥ ಸಿಗುತ್ತದೆ.

ಮತ್ತೆ ಮಿಕ್ಕಂತೆ ಎಲ್ಲಾ ಸೌಖ್ಯ.
ಸರಕಾರದ ದಯೆಯಿಂದ ನಾನು ಇನ್ನೂ ಜೀವಂತ ಇದ್ದೇನೆ. ಇಷ್ಟೆಲ್ಲಾ ಮಳೆ ಬಂದು ಅನಾಹುತ ಆದರೂ, ಸ್ವಲ್ಪ ಲೆಟ್ ಆದರೂ ಮನೆಗೆ ಜೀವಂತ ತಲುಪಿದ್ದೇನೆ. ಇದಕ್ಕೆಲ್ಲ ನಿಮ್ಮ ದಕ್ಷ ಆಡಳಿತವೇ ಕಾರಣ.

ನಿಮ್ಮನ್ನು ಜೀಸಸ್ ಸುಖವಾಗಿ ಇಟ್ಟಿರಲಿ ಎಂದು ಎರಡು ಬಾಳೆಹಣ್ಣು ನೈವೇದ್ಯ ಮಾಡಿ ಬೇಡಿಕೊಳ್ಳುವೆ.

Sunday, January 1, 2017

ಸುಲಭದಲ್ಲಿ ಕೇಕ್ ಮಾಡುವುದು ಹೇಗೆ? (ಮೊಟ್ಟೆ ಮತ್ತೆ ಆವೇನ್ ಇಲ್ಲದೆ!)

(ಎಂದಿನಂತೆ ಈ ಪೋಸ್ಟು ಸಿಹಿ ಇಷ್ಟ ಪಡುವ ಗಂಡು ಜೀವಿಗಳಿಗೆ ಮಾತ್ರ)

ನಿಮಗೆ ಕೇಕ್ ಇಷ್ಟವೇ? ಆದರೆ ಅದನ್ನು ಪಾರ್ಟಿಗಳಲ್ಲಿ, ಬೇಕರಿ ಗಳಲ್ಲಿ ಮಾತ್ರ ತಿಂದಿರುವಿರೆ? ಮನೆಯಲ್ಲಿ ಮಾಡಿಲ್ಲವೇ?
ಚಿಂತೆ ಬೇಡ. ನಿಮಗೆ ಸುಲಭಕ್ಕೆ ಕೇಕ್ ಮಾಡುವ ವಿಧಾನ ಹೇಳಿ ಕೊಡಲಿದ್ದೇನೆ.
ಅಯ್ಯೋ.. ನಾವು ಮೊಟ್ಟೆ ತಿನ್ನೋಲ್ಲ, ಮನೇಲಿ ಆವೇನ್ ಇಲ್ಲ ಎಂದು ಕೊಸರಿಸಬೇಡಿ. ಈಗ ನಾನು ಹೇಳಿ ಕೊಡುವ ವಿಧಾನಕ್ಕೆ ಅವೆರಡೂ ಅಗತ್ಯ ಇಲ್ಲ.

ಮೊದಲಿಗೆ ಬೇಕಾಗುವ ಪದಾರ್ಥಗಳ ಪಟ್ಟಿ ಮಾಡೋಣ.

1. ಒಂದು ಲೋಟ ಮೈದಾ ಹಿಟ್ಟು. (ಅಡುಗೆ ಮನೆಯ ಯಾವುದಾದರೂ ಒಂದು ಅರೆಯಲ್ಲಿ ಇರುತ್ತೆ ನೋಡಿ.)
2. ಅರ್ದ ಲೋಟ ಮೊಸರು. (ಇದು ಫ್ರಿಜ್ ನಲ್ಲಿ ಇರುತ್ತೆ. )
3. ಕಾಲು ಲೋಟ ಅಡುಗೆ ಎಣ್ಣೆ. (ಅಲ್ಲೇ ಯಾವುದಾದರೂ ಕ್ಯಾನ್ ನಲ್ಲಿ ಇರುತ್ತೆ, ಸ್ವಲ್ಪ ಗಮನಿಸಿ)
4. ಅರ್ದ ಲೋಟ ಸಕ್ಕರೆ ಪುಡಿ. (ಪುಡಿ ಇಲ್ಲಾ ಅಂದ್ರೆ, ಸಕ್ಕರೆ ನ ಮಿಕ್ಸಿ ಲಿ ಹಾಕಿ ಪುಡಿ ಮಾಡಿಕೊಳ್ಳಿ. – ಹಾಗೆ ಪುಡಿ ಮಾಡಿಕೊಳ್ಳಲು, ಚಿಕ್ಕ ಜಾರ್ ಉಪಯೋಗಿಸಿ. ಆಮೇಲೆ ಜಾರ್ ತೊಳೆದು.. ಅದನ್ನ ಇಟ್ಟ ಜಾಗದಲ್ಲೇ ಇಡಿ ಮರ್ರೆ. ಯಾರಿಗೆ ಬೇಕು, ಆಮೇಲೆ ಉಗಿಸಿಕೊಳ್ಳೋ ಗ್ರಹಚಾರ )
5. ಒಂದು ಚಿಟಿಕೆ ಅಡುಗೆ ಸೋಡಾ. (ಇದು ಸಾಮಾನ್ಯಕ್ಕೆ ಮನೇಲಿ ಇರುತ್ತೆ. ಅಡುಗೆ ಉಪ್ಪಿನ ರೀತಿಯೇ ಇರುತ್ತೆ. ಚೂರು ಪತ್ತೆದಾರಿಕೆ ಮಾಡಿ, ಹುಡುಕಬೇಕು)
6. ಅರ್ದ ಟೀ ಚಮಚೆ ಬೇಕಿಂಗ್ ಪೌಡರ್. (ಇದು ಇಲ್ಲದೆ ಇದ್ದಲ್ಲಿ, ಹೊರಗಡೆ ಇಂದ ತರಬೇಕಾದೀತು. 35 ರುಪಾಯಿಗೆಲ್ಲ ಪುಟ್ಟ ಪ್ಯಾಕೆಟ್ ಸಿಗುತ್ತೆ.)
7. ವೆನಿಲ್ಲಾ ಅಥವಾ ಪೈನ್ ಆಪಲ್ ಎಸೆನ್ಸ್. (ಇದು ಕೂಡ ಮನೇಲಿ ಇಲ್ಲ ಅಂದ್ರೆ ತರಬೇಕಾದೀತು. 10-೧೫ ರುಪಾಯಿಗೆಲ್ಲ ಪುಟ್ಟ ಡಬ್ಬಿ ಸಿಗುತ್ತೆ.)
8. ಕೊನೆಗೆ ಒಂದು ಚಿಟಿಕೆ ಅಡುಗೆ ಉಪ್ಪು.


ಈಗ ಅಗತ್ಯ ವಸ್ತುಗಳ ಪಟ್ಟಿ.
1. ಒಂದು ಕುಕ್ಕರ್. ದಿನಾ ಅನ್ನ ಮಾಡುತ್ತಲ್ಲ ಅದೇನೇ.
2. 10 ಚಮಚೆ ಅಡುಗೆ ಉಪ್ಪು.
3. ಒಂದು ಅಲುಮಿನಿಯಂ ಅಥವಾ ಸ್ಟೀಲ್ ಬಟ್ಟಲು. ತಳ ಚಪ್ಪಟೆ ಇರಬೇಕು.


ಈಗ ಕೇಕ್ ತಯಾರಿಸುವ ವಿಧಾನ ನೋಡೋಣ.
1. ಮೊದಲಿಗೆ ಕುಕರ್ ಗೆ (ಒಣಗಿದ ಕುಕರ್ ) 10 ಚಮಚೆ ಉಪ್ಪು ಹಾಕಿ. ಅಥ್ (10 ಅಥವಾ ತಳ ಮುಚ್ಚುವಷ್ಟು ಉಪ್ಪು ಹಾಕಿ) ಆಮೇಲೆ ರಿಂಗ್ ಇಡಿ. ಅದರ ಮೇಲೆ ಕುಕರ್ ಪ್ಲೇಟ್ (ತೂತ ತೂತ ಇರುತ್ತಲ್ಲ.. ಅದು) ಇಡಿ. ನಂತರ ಓಲೆ ಹಚ್ಚಿ, ಅದರ ಮೇಲೆ ಕುಕ್ಕರಿಸಿ. (ನೀವು ಓಲೆ ಹತ್ತಬೇಡಿ. ಕುಕರ್ ಇಡಿ ಅಂದೆ ಅಷ್ಟೇ..)



2. ಮುಚ್ಚುಳದ ವಿಷಲ್ ಹಾಗು ಗ್ಯಾಸ್ಕೆಟ್ ತೆಗೆದು ಮುಚ್ಚಿ..
3. ನಂತರ ಒಂದು ಬಟ್ಟಲಿಗೆ ಮೊಸರು ಹಾಕಿ.
4. ಅದಕ್ಕೆ ಸಕ್ಕರೆ ಪುಡಿ ಸೇರಿಸಿ.
5. ಈಗ ಎಣ್ಣೆ ಸೇರಿಸಿ. (ಹೊಟ್ಟೆ ಗೆ ಹಾಕುವ ಎಣ್ಣೆ ಅಲ್ಲ! )
6. ಕೊನೆದಾಗಿ ಮೈದಾ, ಸೋಡಾ, ಬೇಕಿಂಗ್ ಪೌಡರ್, ಉಪ್ಪು ಎಲ್ಲಾ ಹಾಕಿ.
7. ಒಂದು ಪುಟ್ಟ ಚಮಚೆತಗೊಂಡು ಎಲ್ಲವನ್ನು ಚೆನ್ನಾಗಿ ಮಿಕ್ಸ್ ಮಾಡಿ. ಎಲ್ಲೂ ಗಂಟು ಕಟ್ಟಿರಬಾರದು. J


ಇಲ್ಲಿಗೆ ನಿಮ್ಮ ಕೇಕ್ ಮಿಕ್ಸ್ ತಯಾರು.
ನೀವು ಮೊದಲೇ ತೆಗೆದಿಟ್ಟು ಕೊಂಡ ಚಪ್ಪಟೆ ತಳದ ಬಟ್ಟಲು ತೆಗೆದುಕೊಂಡು ಅದಕ್ಕೆ ಒಳಗೆ ಚೆನ್ನಾಗಿ ಎಣ್ಣೆ ಸವರಿ. ಆಮೇಲೆ ಅರ್ದ ಚಮಚೆ ಮೈದಾ ಹಿಟ್ಟು ಸಿಂಪಡಿಸಿ. ಆಮೇಲೆ ತಯಾರಿಸಿಟ್ಟುಕೊಂಡ ಹಿಟ್ಟು ಅದಕ್ಕೆ ಸುರುವಿ.


ಇಷ್ಟು ಆಗುವಷ್ಟರಲ್ಲಿ ಸರಿ ಸುಮಾರು 10 ನಿಮಿಷ ಆಗಿರಬಹುದು. ಅಲ್ಲಿಗೆ ನಿಮ್ಮ ಕುಕರ್ ಸಾಕಷ್ಟು ಬಿಸಿ ಆಗಿರುತ್ತೆ.
ಮೆಲ್ಲನೆ ಮುಚ್ಚುಳ ತೆಗೆದು, ಅದರ ಒಳಗೆ ಹಿಟ್ಟು ಸುರುವಿದ ಬಟ್ಟಲು ಮೆಲ್ಲನೆ ಜೋಪಾನವಾಗಿ ಇಡಿ. ಆ ಕಡೆ ಈ ಕಡೆ ಕೈ ತಾಗಿದರೆ, ಸುಟ್ಟು ಹೋದೀತು. ಮುಚ್ಚುಳ ಹಾಕಿ, 30-40 ನಿಮಿಷ ಅಡುಗೆ ಮನೆಯಿಂದ ಹೊರ ನಡೆಯಿರಿ. (ಸ್ಟವ್ ಸಿಮ್ - ಸಣ್ಣನೆಯ ಉರಿಯಲ್ಲಿ ಇರಲಿ)


40 ನಿಮಿಷದ ನಂತರ ಮುಚ್ಚುಳ ತೆಗೆದು ನೋಡಿ. ಕೇಕ್ ಆಗಿರುತ್ತೆ. ಬೇಕಿದ್ದಲ್ಲಿ ಚಿಕ್ಕ ಚಾಕು ತೆಗೆದು ಅದಕ್ಕೆ ಚುಚ್ಚಿ ನೋಡಬಹುದು. ಚಾಕು ಆರಂ ಆಗಿ ವಾಪಾಸ್ ಬಂದ್ರೆ, ಹಸಿ ಹಿಟ್ಟು ಹಿಡಿಯದಿದ್ದರೆ.. ಕೇಕ್ ಬೆಂದಿದೆ ಎಂದು ಅರ್ಥ.
ಸ್ಟವ್ ಆಫ್ ಮಾಡಿ.
ಬಟ್ಟಲು ಹೊರಗಿಡಿ. ಸ್ವಲ್ಪ ತಣ್ಣಗೆ ಆಗಲಿ.

ಈಗ ಕೇಕ್ ನ ಪ್ಲೇಟ್ ಗೆ ವರ್ಗಾಯಿಸಿ.


ಎಚ್ಚರಿಕೆ:
1. ಖಾಲಿ ಕುಕರ್ ಓಲೆ ಮೇಲೆ ಇಡಲು ನಿಮ್ಮ ಹೆಂಡತಿ ಹೆದರಬಹುದು. ಮದ್ಯೆ ಮದ್ಯೆ ಬಾಯಿ ಹಾಕಿ, ನಿಮ್ಮ ಏಕಾಗ್ರತೆ ಕೆಡಿಸಬಹುದು. ಏನಾದ್ರೂ ನೆಪ ಹೇಳಿ, ಉದಾಹರಣೆಗೆ, ಇಂದು ನೀವು ಆಕೆಗೆ ಪ್ರೋಪೋಸ್ ಮಾಡಿದ ದಿನ, ಮೊದಲು ನೋಡಿದ ದಿನ.. ಇತ್ಯಾದಿ.. ಹೇಳಿ, 50 ನಿಮಿಷದ ನಂತರ ಸರ್ಪ್ರೈಸ್ ಕೊಡುವುದಾಗಿ ಹೇಳಿ.. ಹೆಂಡತಿಯನ್ನು ಒಂದು ರೂಮಿನಲ್ಲಿ ಕೂಡಿ ಹಾಕಿ.!
2. ಕೇಕಿನ ಮೊದಲ ಪೀಸನ್ನು, ಆಕೆಗೇ ಮೊದಲು ತಿನ್ನಿಸಿ.



3. ಆರೋಗ್ಯವಾಗಿ ಇದ್ದಲ್ಲಿ, ಅರ್ದ ಗಂಟೆಯ ನಂತರ ನೀವು ಕೂಡ ತಿನ್ನಿರಿ.
4. ನಿಮಗೆ ಜಯವಾಗಲಿ.

Tuesday, July 5, 2016

ಬೇಸನ್ ಲಾಡು ಮಾಡುವ ವಿಧಾನ. :)



ಈ ಪೋಸ್ಟು, ಸಿಹಿ ಇಷ್ಟಪಡುವ ಗಂಡು ಜೀವಿಗಳಿಗೆ  ಮಾತ್ರ. J


ಹೆಂಡತಿ ಯಾವಾಗಲೂ “ನಿಮಗೆ ಒಂದು ಒಗ್ಗರಣೆ ಕೂಡ ಹಾಕೋಕೆ ಬರೋಲ್ಲ” ಅಂತ ಸ್ವಾಟೆ ತಿವಿಯುತ್ತಿದ್ದಾಳೆಯೇ? ಅಥವಾ ದಿನಾಲು ಒಬ್ಬರದೇ ಕೈ ರುಚಿ ನೋಡಿ ನಾಲಿಗೆ ಕೆಟ್ಟು ಹೋಗಿದೆಯೇ? ಇಲ್ಲಿದೆ ಅದಕ್ಕೆ ಪರಿಹಾರ.
ಮಿ
ತ್ರರೇ, ನಾನು ನಿಮಗೆ ಅತಿ ಸುಲಭವಾಗಿ ಸಿಹಿ ತಿಂಡಿಯೊಂದನ್ನು ಮಾಡುವುದು ಹೇಗೆಂದು ತಿಳಿಸಿ ಕೊಡಲಿದ್ದೇನೆ. ನೀವು ಅಂಗಡಿಗಳಲ್ಲಿ, ಸಮಾರಂಭಗಳಲ್ಲಿ ಬೇಸಿನ್ ಲಾಡು ತಿಂದು ಬಾಯಿ ಚಪ್ಪರಿಸಿರುತ್ತಿರಿ. ಇದನ್ನು ನೀವು ಮನೆಯಲ್ಲಿ ಅತಿ ಸುಲಭವಾಗಿ ಮಾಡಬಹುದು.

ಈ ಕೆಳಗೆ ಲಾಡು ಮಾಡಲು ಬೇಕಾಗುವ ಪದಾರ್ಥ ಹಾಗು ವಿಧಾನಗಳನ್ನು ಹಂತಹಂತವಾಗಿ ವಿವರಿಸಲಾಗಿದೆ. ಮಾಡಿ, ನೋಡಿ ಹಾಗು ಕೊನೆಗೆ ತಿಂದು (ಅಥವಾ ತಿನ್ನಿಸಿ) ಆನಂದಿಸಿ.

1. ಮಾಡುವ ಸಮಯ: ಹೌದು. ಹೆಂಡತಿ ಮನೆಯಲ್ಲಿ ಇಲ್ಲದ ಸಮಯ ಆರಿಸಿಕೊಳ್ಳಿ. ಯಾಕೂ ಅಲ್ಲ, ಮಧ್ಯ ಮಧ್ಯ ಇದನ್ನು ಹಿಂಗೆ ಮಾಡಬೇಕು, ಹಾಗೆ ಯಾಕೆ ಮಾಡಬೇಕು, ಎಂಬಿತ್ಯಾದಿ ಪ್ರಶ್ನೆ ಕೇಳುತ್ತಿರುತ್ತಾಳೆ. ನೀವು ಕಾರು ಓಡಿಸುವಾಗ, ಆಕೆಯ ಕಿರಿ ಕಿರಿ ಹೆಂಗೆ ಇರುತ್ತೋ, ಹಂಗೆಯೇ! ಈ ಪ್ರಶ್ನೆಗಳು ನಿಮ್ಮ ಏಕಾಗ್ರತೆಗೆ ಭಂಗ ತರುತ್ತದೆ.

2. ಆತ್ಮವಿಶ್ವಾಸ: ನಾಯಕನಾಗುವುದು ಹೇಗೆ? ಇಡ್ಲಿ, ಆರ್ಕಿಡ್ ಮತ್ತು ಆತ್ಮವಿಶ್ವಾಸ ಈ ತರದ ಪುಸ್ತಕಗಳನ್ನು ಓದಿರಬಹುದು ಅಥವಾ ನಿಮ್ಮ ಕಛೇರಿಗಳಲ್ಲಿ ಕೊಟ್ಟ ಕೆಲಸ ಮುಗಿಸುವುದು ಹೇಗೆ ಎಂಬೆಲ್ಲ ತರಬೇತಿ ಪಡೆದಿರಬಹುದು.
ಅದನ್ನು ಸ್ವಲ್ಪ ನೆನಪಿಸಿಕೊಳ್ಳಿ. ಏನೇ ಮಾಡುವ ಮೊದಲು, ಆತ್ಮ ವಿಶ್ವಾಸ ಮುಖ್ಯ. ನೀವು ಅಡುಗೆ ಮನೆಗೆ ನುಗ್ಗಿ, ಏನೋ ಒಂದು ಭರ್ಜರಿಯಾದ್ದನ್ನು ಸಾಧಿಸಬಲ್ಲಿರಿ ಎಂದು ನಂಬಿರಿ.

3. ಬೇಕಾಗುವ ಸಾಮಗ್ರಿಗಳು: ಫ್ರಿಜ್ಜಿನಿಂದ ಕಡಲೆ ಹಿಟ್ಟು (ಹೊರಗಿಟ್ಟರೆ, ಹುಳ ಆಗುವುದು ಎಂದು ಸಾಮಾನ್ಯವಾಗಿ ಅದನ್ನು ಫ್ರಿಜ್ಜಿನಲ್ಲಿ ಇಟ್ಟಿರುತ್ತಾರೆ- ಇದು ಹಳದಿ ಬಣ್ಣ ಇರುತ್ತದೆ. ಇದೇ ಹಿಟ್ಟಿನಿಂದ ನಿಮಗೆ ಶನಿವಾರ – ಭಾನುವಾರಗಳಲ್ಲಿ ಭಜ್ಜಿ – ಬೋಂಡ ಮಾಡಿ ಕೊಡುವುದು. ಇಷ್ಟು ಕ್ಲೂ ನಿಂದ ನಿಮಗೆ ಹಿಟ್ಟು ಹುಡುಕಲು ಸಹಾಯ ಆಗಬಹುದು.) ದ್ರಾಕ್ಷಿ ಗೋಡಂಬಿ, ಬಾದಾಮಿ (ಅಳತೆ ಒಂದು ಮುಷ್ಠಿ), ಕೊಬ್ಬರಿ ಹಾಗು ಅಮ್ಮ ಊರಿನಿಂದ ಮಾಡಿ ಕೊಟ್ಟು ಕಳಿಸಿದ ತುಪ್ಪ ತೆಗೆದುಕೊಳ್ಳಿ. ಯಾವುದೇ ಕಾರಣಕ್ಕೂ ಹೆಂಡತಿ ತಯಾರಿಸಿದ ವಾಸನೆಯುಕ್ತ ತುಪ್ಪ ಬೇಡ.

3. ಈಗ ಒಲೆ ಹಚ್ಚಿ. ಅದರ ಮೇಲೆ ಒಂದು ಬಾಣಲೆ ಇಡಿರಿ. ನಾನ್ ಸ್ಟಿಕ್ ಬಾಣಲೆ ಆಗಿದ್ದರೆ, ಅದಕ್ಕೇ ಅಂತ ಒಂದು ಮರದ ಮಗುಚೋ ಕೈ ಇರುತ್ತದೆ. ಅದನ್ನ ತೆಗೆದು ಕೊಳ್ಳಿ. (ಮರದ್ದು ಸಿಕ್ಕಿಲ್ಲ ಅಂತ ಸ್ಟೈನ್ ಲೆಸ್ ಸ್ಟೀಲ್ ಉಪಯೋಗಿಸಿದರೆ, ನಿಮ್ಮ ಮನೆಯಲ್ಲಿ ನಡೆಯುವ ಅಹಿತಕರ ಘಟನೆಗಳಿಗೆ ನಾನು ಜವಾಬುದಾರ ಅಲ್ಲ. ಹೆಂಡತಿ ಕೋಪಗೊಂಡು ಲಟ್ಟಣಿಗೆಯಲ್ಲಿ ನಾಕು ಕೊಡಬಹುದು! ) ಅದು ಸಿಗದೇ ಇದ್ದಲ್ಲಿ, ಅಲ್ಲೇ  ಮಿಕ್ಸಿ ಹಿಂಬಾಗ ದೂಳು ತಿನ್ನುತ್ತಾ ಇರುವ ಅಲುಮಿನಿಯಂ ಬಾಣಲೆ ತೆಗೆದು ಕೊಳ್ಳಿರಿ. ವರೆಸಿ ಒಲೆ ಮೇಲೆ ಕುಕ್ಕಿ.

4. ಬಾಣಲೆಗೆ ಒಂದು ಲೋಟ ಕಡಲೆ ಹಿಟ್ಟು ಹಾಕಿ. ಲೋಟ ಮುಂದೆ ಉಪಯೋಗಕ್ಕೆ ಬರುತ್ತದೆ, ಕೂಡಲೇ ಅದನ್ನ ಸಿಂಕಿಗೆ ಬಿಸುಡಬೇಡಿ. ಆದಷ್ಟು ಸಣ್ಣ ಉರಿಯಲ್ಲಿ, ಹಿಟ್ಟನ್ನು ಸೌಟಿನಿಂದ ತಿರುವುತ್ತಾ ಇರಿ. ಸುಮಾರು 10 ನಿಮಿಷ. ಅಥವಾ ನಿಮ್ಮ ಬಲ ಗೈ ನೋವು ಬರುವಷ್ಟು ಹೊತ್ತು. ಆಮೇಲೆ ಸ್ಟೋವ್ ಆರಿಸಿ, ಹಿಟ್ಟನ್ನು ಒಂದು ತಟ್ಟೆಗೆ ಸುರುವಿಕೊಳ್ಳಿ. ಒಂದು ದ್ರಾಕ್ಷಿ ಗೋಡಂಬಿ ಹಾಗು ಬಾದಾಮಿ ಬಾಯಿಗೆ ಹಾಕಿಕೊಳ್ಳಿ.

5. ಒಂದು ಮುಕ್ಕಾಲು ಲೋಟ ಸಕ್ಕರೆ ತೆಗೆದುಕೊಳ್ಳಿ. ಸಕ್ಕರೆ ಅಡುಗೆಮನೆಲೇ ಅಲ್ಲೇ ಎಲ್ಲೋ ಇರುತ್ತೆ. ಚೂರು ಕಣ್ಣು ಆಡಿಸಿ.
ಅದಕ್ಕೆ ನಾಲ್ಕು ಏಲಕ್ಕಿ ಹಾಕಿ (ಸಿಕ್ಕಿದರೆ ಮಾತ್ರ) ಮಿಕ್ಸಿಯ ಸಣ್ಣ ಜಾರಿನಲ್ಲಿ ಸರಿ ಸುಮಾರು 100 ರಿಂದ 140 ಸೆಕೆಂಡ್ ಓಡಿಸಿ. ಆಮೇಲೆ ಮಿಕ್ಸಿ ಆಫ್ ಮಾಡಿ, ಅದನ್ನು ಪಕ್ಕಕ್ಕೆ ಇಡಿ. ಲೋಟ ಕೂಡ ಅಷ್ಟೇ, ಸಿಂಕಿಗೆ ಹಾಕಿ. ನಮ್ಮ ಉಪಯೋಗಕ್ಕೆ ಅವು ಇನ್ನು ಇಲ್ಲ.

6. ಅರ್ದ ಲೋಟ / ಒಂದು ಮುಷ್ಠಿ ಅಥವಾ ಚೂರು ಬೋರು ಬರುವಷ್ಟು ಕೊಬ್ಬರಿ ತುರಿದುಕೊಂಡು, ಬಾಣಲೆಯಲ್ಲಿ ಇನ್ನೂರು ಸೆಕೆಂಡ್ ಹುರಿಯಿರಿ. ಆಮೇಲೆ ಅದನ್ನು ಆಗಲೇ ಹುರಿದಿಟ್ಟ ಹಿಟ್ಟಿಗೆ ಸೇರಿಸಿ. ಕಲೆಸಿ. ತುರಿದು ಸುಸ್ತು ಆಗಿರುವುದರಿಂದ ಶಕ್ತಿಗೆ ದ್ರಾಕ್ಷಿ ಗೋಡಂಬಿ, ಸೇವಿಸಿ!

7. ಈಗ ಗಮಗಮಿಸುವ ನಾಕು ಚಮಚ ತುಪ್ಪ, ಹಿಟ್ಟಿಗೆ ಹಾಕಿ. (ಚಮಚ ಸಾಧಾರಣ ದಿಂದ ಮಧ್ಯಮ ಗಾತ್ರದ್ದು.) ಚೆನ್ನಾಗಿ ಕಲೆಸಿ.
ಇಷ್ಟು ಹೊತ್ತಿಗೆ, ಹಿಟ್ಟು ಸಂಪೂರ್ಣ ತಣ್ಣಗೆ ಆಗಿರುತ್ತದೆ.

8. ಇನ್ನೂ ಕೆಲಸ ಮುಗಿದಿಲ್ಲ. ಬಾಣಲೆ ಮತ್ತೆ ಒಲೆ ಮೇಲೆ ಇಟ್ಟು, ಒಂದೆರಡು ಚಮಚೆ ತುಪ್ಪ ಹಾಕಿ. ಅದಕ್ಕೆ ಬಾದಮಿ (ಇನ್ನೂ ಉಳಿದಿದ್ದರೆ ) ಚೂರು ಚೂರು ಮಾಡಿ ಸೇರಿಸಿ. ಸರಿಯಾಗಿ ಒಂದರಿಂದ ಇಪ್ಪತ್ತರ ತನಕ ಸಂಖ್ಯೆಯನ್ನು ಮನಸ್ಸಿನಲ್ಲಿ ಎಣಿಸಿ. ಇಪ್ಪತ್ತೊಂದು ಬರುವಾಗ ದ್ರಾಕ್ಷಿ ಹಾಕಿ. 28ಕ್ಕೆ ಒಲೆ ಆರಿಸಿ, ಹಿಟ್ಟನ ಮಿಶ್ರಣಕ್ಕೆ ಇದನ್ನು ಸೇರಿಸಿ.

9. ಈ ಹಿಟ್ಟಿಗೆ, ಸಕ್ಕರೆ ಪುಡಿ ಹಾಕಿ.  (ಆಗಲೇ ಪುಡಿ ಮಾಡಿದ್ರಲ್ಲ, ಅದೇನೇ)
ಚೆನ್ನಾಗಿ ಕಲೆಸಿ, ಸಣ್ಣ ಸಣ್ಣ ಉಂಡೆ ಮಾಡಿ.
ಇಲ್ಲಿಗೆ ರುಚಿಕರವಾದ ಬೇಸನ್ ಲಾಡು ತಯಾರು.

ಹೆಂಡತಿ ಬಂದಮೇಲೆ, ಕೊಡಿ. ಆಕೆ ತಿಂದು ಸ್ವಲ್ಪ ಹೊತ್ತು.. ಸೌಖ್ಯದಿಂದ ಇದ್ದಲ್ಲಿ, ನೀವೂ ಕೂಡ ತಿನ್ನಿ. J



ಕೊಸರು:
ಒಮ್ಮೊಮ್ಮೆ ತುಪ್ಪ ಜಾಸ್ತಿ ಆಗಿ, ಹುರಿದಿದ್ದು ಕಡಿಮೆ ಆಗಿ, ಹಿಟ್ಟು ಸ್ವಲ್ಪ ಮೆತ್ತಗೆ ಆದರೆ.. ಉಂಡೆ ಕಟ್ಟಲು ಬಾರದು.
ಆದ್ರೆ ಚಿಂತಿಸುವ ಅಗತ್ಯ ಇಲ್ಲ.
ಹೆಂಗೆ ಬರುತ್ತಾ ಹಂಗೆ ಉಂಡೆ ಕಟ್ಟಿ. ಅದು ಉಂಡೆ ಯಿಂದ ಚಪ್ಪಟೆ ಆಕಾರ ತಾಳುವಾಗ .. ಮೆಲ್ಲಕೆ ಹೊತ್ತೊಯ್ದು ಫ್ರಿಜ್ಜಿನಲ್ಲಿ ಸ್ವಲ್ಪ ಹೊತ್ತು ಇಡಿ. ಭಾಗಷ್ಯ ಎರಡು ಸಿಗರೇಟು ಸೇದುವ ಸಮಯದಷ್ಟು.

ನಂತರ ಹೆಂಡತಿ ಬಂದಮೇಲೆ..
ಇದು “ಗೀ ಫ್ಲೇವರ್ಡ್, ಡ್ರೈ ರೋಸ್ಟೆಡ್ ಬಿಸ್ಕುಟ್” ಅಂತ ಹೇಳಿ ಕೊಡಿ.
ತಣ್ಣಗೆ, ಸಿಹಿ ಸಿಹಿಯಾಗಿ, ತುಪ್ಪದ ಸುವಾಸನೆಯಲ್ಲಿ ಚೆನ್ನಾಗಿಯೇ ಇರುತ್ತದೆ.

ಇಲ್ಲಿಗೆ ಬೇಸನ್ ಲಾಡು ಮಾಡುವ – ತಿನ್ನುವ ವಿಧಾನ ಸಮಾಪ್ತಿ.

ಸರ್ವರಿಗೂ ಒಳ್ಳೇದು ಆಗಲಿ.